Нүүр хуудасМэдээТээвэрчдийг дархлаажуулж эхэлсэн тул нүүрс тээврийг хэвийн явуулж өгөхийг хүслээ

Тээвэрчдийг дархлаажуулж эхэлсэн тул нүүрс тээврийг хэвийн явуулж өгөхийг хүслээ

Уул уурхай, хүнд үйлдвэрийн сайд Г.Ёндон БНХАУ-аас Монгол Улсад суух Онц бөгөөд Бүрэн эрхт элчин сайд Цай Веньруйтай Гашуунсухайт боомтын нүүрс тээвэрт гарсан асуудлаар утсаар ярьж харилцан мэдээлэл солилцлоо.

Салбарын сайд ярианыхаа эхэнд Гашуунсухайт боомтоор нэвтрэх тэр дундаа нүүрс болон зэсийн баяжмал тээвэрлэж буй автомашины тоо сүүлийн өдрүүдэд буурч байгаа талаар тодруулахад Элчин сайд Цай Веньруй Оюу толгой ХХК-д бүртгэгдсэн коронавирусын халдварын тохиолдолтой холбоотойгоор хилээр нэвтрэх машины тоог бууруулсан болохыг мэдээллэсэн.

Уул уурхай, хүнд үйлдвэрийн сайд Г.Ёндон Оюу толгой компанид бүртгэгдсэн тохиолдол нь зөөвөрлөгдсөн тохиолдол бөгөөд тээвэрчдийг вакцинд хамруулж эхэлсэн, уурхайчдыг тун удахгүй дархлаажуулалтад хамруулахаар болсон тул энэ талаар Хятадын талд уламжилж тээврийн хэвийн үйл ажиллагааг хангаж өгөхийг хүссэн юм.

Элчин сайд Цай Веньруй Оюу толгойн нөхцөл байдлыг харгалзан үзэж үүссэн асуудлыг эргэн хэвийн горимонд оруулах боломжтой талаар ярьсан.

Мөн сайд Г.Ёндон Английн металын биржийн Good delivery сертификаттай дөрвөн компани Хятад улсад үйл ажиллагаа явуулж байгааг онцлон тэмдэглээд БНХАУ-ын алт цэвэршүүлэх үйлдвэрүүдийн туршлагаас судлах, Монгол Улсад үнэт метал цэвэршүүлэх үйлдвэр барихад хамтран ажиллах зорилгоор үйлдвэрүүдтэй албан ёсоор холбож өгөх хүсэлтийг Элчин сайдад тавьсан.

Элчин сайдын зүгээс энэ асуудалд анхаарал хандуулан ажиллахаа илэрхийлсэн юм.

Эх сурвалж: Уул уурхай, хүнд үйлдвэрийн яам

ХАРИУ ҮЛДЭЭХ

Сэтгэгдэл оруулна уу!
энд нэрээ оруулна уу

This site uses Akismet to reduce spam. Learn how your comment data is processed.

ИХ УНШИГДСАН