УИХ-ын чуулганы өнөөдрийн хуралдаанаар УИХ-ын гишүүн Н.Энхболд нарын дөрвөн гишүүний өргөн мэдүүлсэн Монгол Улсын Их Хурлын сонгуулийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн УИХ-ын тогтоолын төслийн анхны хэлэлцүүлгийг хийж байна.
Тус хуулийн төсөлд УИХ-ын сонгуулийг хосолсон тогтолцоотой байхаар буюу 38 гишүүнийг сонгуулийн тойргоос, 38 гишүүнийг сонгуульд оролцохоор бүртгүүлсэн нам, эвслийн нэр дэвшигчдийн жагсаалтаас тус тус сонгохоор тусгаад байгаа юм. Мөн Монгол Улсаас гадаад улсад суугаа Элчин сайдын яам, Олон улсын байгууллагын дэргэд суугаа Байнгын төлөөлөгчийн газар, Ерөнхий консулын газар, Консулын газар, Консулын төлөөлөгчийн газар байрладаг гадаад улсад байгаа сонгуулийн эрх бүхий иргэн сонгуульд оролцож, санал өгөх эрхтэй байхаар тусгасан.
Мөн нам эвсэл жагсаалтаар нэр дэвшүүлэхдээ 1:1 хүйсийн харьцаатай жагсаалтын дарааллыг үндэслэн нэр дэвшүүлнэ. Нам эвслээс нэр дэвшиж байгаа нийт нэр дэвшигчийн 30-аас доошгүй хувь нь аль нэг хүйсийнх байна гэх зэрэг заалтыг тусгажээ.
Одоогийн хүчин төгөлдөр мөрдөгдөж буй хуулиараа 200 сонгогч тутамд нэг ухуулагч ажиллахаар заасан. Шинээр өргөн барьсан хуулийн төслөөр бол, нийслэл болон аймгийн төвд 400 сонгогч тутамд нэг ухуулагч, бусад газарт 200 сонгогч тутамд нэг ухуулагч ажиллахаар тусгаад буй. Тус ухуулагч нь сайн дурын үндсэн дээр ажиллана. Хэрэв хөлс мөнгөтэй ажилласан тохиолдолд хөдөлмөрийн хөлсний доод хэмжээтэй адилтгах түвшний урамшууллаар ажиллах юм байна.
Харин хэвлэмэл материалын хэмжээний хувьд, 3 хэвлэлийн хуудас сонин сэтгүүлийг хэвлэн тарааж болохоор заасан бол одоогийн хувилбараар тус бүр 2 хэвлэлийн хуудас болгож бууруулжээ. Ухуулах хуудас нэг хэсэгт 20-иос илүүгүй байхаар тогтоосон байсан бол одоогийн хувилбараар 10 буюу 50 хувиар бууруулаад байна. Сурталчилгааны зурагт самбарыг 60 хүртэл хувиар бууруулсан. Өөрөөр хэлбэл, нэг хэсэгт 10 зурагт самбар байрлуулах боломжтой байдаг бол одоо аймаг, дүүргийн нэг хэсэгт 5, бусад хэсэгт 3 самбартай байна хэмээн заажээ. Нэг хэсэгт 4 тээврийн хэрэгсэл ашиглахаар заасан байдаг бол шинэ хувилбараар хоёр буюу 50 хувиар бууруулсан юм. Энэ бүхнийг оролцуулан тооцвол сонгуулийн зардал 50 хувиар буурах магадлалтай” гэж хуулийн төслийг санаачлагчид чуулганд танилцууллаа.
