Засгийн газрын хэрэг эрхлэх газрын дарга Д.Амарбаясгалан өнгөрөгч Ням гарагт Буянт-Ухаад байрлах Нисэхийн сургалтын төв, Цахим хөгжил инновацын төв ажиллажээ.
Тэрбээр энэ тухайгаа “Өнөөдөр Иргэний нисэхийн ерөнхий газар, МИАТ, Буянт-Ухаа нисэх буудалд ажиллаж салбарын мэргэжлийн багтай санал солилцлоо.
Хөшигийн хөндийн шинэ нисэх буудал ашиглалтад орсноор Буянт-Ухаа нисэх буудлыг хэрхэн үр ашигтай ашиглах тухайд шийдэл гаргах хэрэгтэй болсон. Ингээд Ерөнхий сайдын өгсөн чиглэлийн дагуу салбарын мэргэжилтнүүдтэй зөвлөлдсөний үндсэн дээр цаашид уг буудалд Нисэхийн сургалтын төв, Цахим хөгжил инновацын төвийг тус тус ажиллуулахаар боллоо.
Буянт-Ухаа хэмээх нисэхийн зориулалттай томхон бүтээн байгуулалтыг зориулалтын дагуу ашиглах хамгийн оновчтой шийдэл нь Нисэхийн сургалтын төв юм. Мөн цаг агаарын болон бусад зайлшгүй шалтгааны улмаас Хөшигийн хөндийд онгоц буух боломжгүй үед Буянт-Ухааг нөөц нисэх буудал болгон ашиглах юм.
![](https://content.ikon.mn/news/2022/9/12/ueq5af_306456280_620069389525072_5259958260568944990_n_h450.jpg)
![](https://content.ikon.mn/news/2022/9/12/ofxld4_306093074_620069392858405_926132301337378967_n_h450.jpg)
Нисэх буудлын оффисын талбайн зарим хэсгийг Цахим хөгжил инновацын төв болгон зохион байгуулж, Цахим хөгжил харилцаа холбооны яам ажиллахын зэрэгцээ тус салбарт үйл ажиллагаа явуулж байгаа хувийн болон төрийн өмчит компаниуд нэг дор байрлаж үйл ажиллагаа явуулах боломжийг бий болгоно. Ингэснээр:
- Буянт-Ухаад Монголын цахиурын хөндийг хөгжүүлэх суурийг бүрдүүлэх
- Төвлөрлийг сааруулах төрийн бодлогыг хэрэгжүүлж хэд хэдэн төрийн байгууллага, хувийн хэвшлийн компаниудыг хотын төвөөс нүүлгэх
- Мэдээллийн технологийн чиглэлийн компаниудад өсөж хөгжих, тэдгээрт ажиллаж буй Монгол инженерүүд аятай тухтай орчинд ажиллах бололцоог бүрдүүлэх боломжууд бий болох юм” гэжээ.