УИХ-ын гишүүн асан Д.Бат-Эрдэнийг эрэн сурвалжилж байгаа мэдээллийн талаар түүний өмгөөлөгч Б.Энх-Амгалангаас тодрууллаа. -Д.Бат-Эрдэнийг эрэн сурвалжилж байгаа нь үнэн үү? -Сүхбаатар дүүргийн Иргэний хэргийн анхан шатны шүүхээс иргэний гаргасан нэхэмжлэлийн дагуу Д.Бат-Эрдэнийн хамаарал бүхий охин компанийг хариуцагчаар татсан. Гэтэл Сүхбаатар дүүргийн хаяг дээрээ байхгүй байгаа тул шүүхэд албадан ирүүлнэ үү гэсэн захирамж гаргасан байсан юм. Шүүхээс Сүхбаатар дүүргийн цагдаагийн хэлтэст албадан ирүүлэх хүсэлт гаргасан байхад захирамж хариуцсан ажилтан нь захирамжаа бүрэн уншилгүй эрэн сурвалжлах цагдаагийн мэдээллийн санд оруулчихсан байсан. Ингээд тухайн ажилтан буруугаа хүлээгээд эрэн сурвалжлах мэдээллийн сангаасаа устгасан юм. Ер нь энэ асуудал эхнээсээ буруу байсан. Нэхэмжлэгч этгээд анх гомдол гаргахдаа иргэн Д.Бат-Эрдэнийн хамаарал бүхий охин компаний хаягийг буруу өгсөн байсан. Гэтэл энэ асуудлыг цагдаа нь ч, шүүх нь ч нягталж үзээгүйгээс ийм хариуцлагагүй явдал боллоо. Түүнээс бус иргэн Д.Бат-Эрдэнийг эрэн сурвалжилж буй асуудал байхгүй. -Ер нь ямар тохиолдолд эрэн сурвалжилдаг юм бэ? -Эрэн сурвалжилна гэдэг нь онц ноцтой гэмт хэрэг үйлдсэн, гэмт хэрэг үйлдээд оргон зайлсан, хорих ангиас болон шүүхээс оргон зайлсан, 72 цагаас хойш сураггүй алга болсон иргэнийг ар гэрийнх нь хүсэлтээр эрэн сурвалжилдаг. Түүнээс биш иргэний хэрэг дээр эрэн сурвалжлах хүсэлт гаргадаггүй. Хаягийн зөрчлөөс үүдээд хариуцагчаар татсан албан бичиг нь очих ёстой этгээдэд ирээгүй байсан болохоос иргэн Д.Бат-Эрдэнэ болон түүний хамаарал бүхий компаниуд хууль шүүхийн байгууллагын ажилд хүндэтгэлтэй ханддаг.
© Зохиогчийн эрх хуулиар хамгаалагдсан.