Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын алба, Сэлэнгэ аймгийн Гэмт хэргээс урьдчилан сэргийлэх ажлыг зохицуулах салбар зөвлөл болон Сэлэнгэ аймаг дахь Шүүхийн Тамгын газартай хамтран “Өсвөр насныхан холбогдсон болон хохирсон гэмт хэрэг, түүнд нөлөөлж буй хүчин зүйл” сэдэвт хэлэлцүүлэг /2025.04.02/ зохион байгууллаа.
Монгол Улсад Гэмт хэргээс урьдчилан сэргийлэх ажлыг зохицуулах зөвлөлийн Ажлын албаны дарга Л.Нямгэрэл хэлэлцүүлгийг нээж хэлсэн үгэндээ “Өнөөгийн манай нийгэмд хүүхэд ахуйн осолд хамгийн их өртдөг газар нь гэр бүлийн орчин, хүүхэд бэлгийн хүчирхийллийн хохирогч болсон гэмт хэргийн 70 хувийг мөн л гэр бүл, ойр дотныхон үйлдсэн байна. Иймд хүүхдийг гэмт хэрэгт холбогдох, хохирогч болгохгүйн тулд урьдчилан сэргийлэх ажлыг төрийн болон төрийн бус чиг үүргийн бүхий л байгууллага нийлж хамтрахаас гадна эцэг эх, асран хамгаалагчдыг татан оролцуулах, тэднийг соён гэгээрүүлэх зайлшгүй шаардлага байна” гэлээ.
Түүнчлэн Хүний эрхийн үндэсний комиссын гишүүн Ж.Хунан илтгэлдээ “Монгол Улс дахь хүний эрх, эрх чөлөөний байдлын талаарх 24 дэх илтгэлд “Эрүүгийн хэрэг хянан шийдвэрлэх ажиллагаан дахь бэлгийн хүчирхийллийн хохирогч хүүхдийн эрхийн зарим асуудал” сэдвийг тусгайлан тусгаж, холбогдох саналын хамт 2025 оны 3 сарын 31-ний өдөр УИХ-д хүргүүлсэн” болохыг онцоллоо.
Энэ үеэр Сэлэнгэ аймгийн Хүүхэд, гэр бүл, залуучуудын хөгжлийн газар, Боловсролын газраас хүүхдийн эрхийн хууль зүйн хорооны үйл ажиллагаа, хүүхэд хамгаалал дахь төрийн захиргааны байгууллагын оролцоо, чиг үүргийн талаар мэдээлэл өгсөн бол аймгийн Гэмт хэргээс урьдчилан сэргийлэх ажлыг зохицуулах салбар зөвлөлийн дарга бөгөөд ИТХ-ын дарга Г.Бат-Орхон хүүхдийг гэмт хэргээс урьдчилан сэргийлэх чиглэлээр авч хэрэгжүүлж буй арга хэмжээ, бодлого чиглэлээ танилцуулав.
Хэлэлцүүлэгт Сэлэнгэ аймаг дахь хууль сахиулах болон хүүхэд хамгааллын чиглэлээр үйл ажиллагаа явуулдаг төрийн захиргааны байгууллагууд, Хүүхдийн эрхийн хууль зүйн хороо, аймгийн 17 сумын хамтарсан багийн төлөөлөл, аймгийн хэмжээний 57 багийн Засаг дарга, боловсролын байгууллагуудын төлөөлөл, хүүхдийн эрхийн чиглэлээр үйл ажиллагаа явуулдаг иргэний нийгмийн байгууллагынхан оролцож, байр суурь, санал хүсэлтээ илэрхийллээ.
