Монгол Улсын Ерөнхийлөгч У.Хүрэлсүх БНХАУ-д төрийн айлчлал хийж байна.
Айлчлалын ач холбогдол, хүлээж буй үр дүнгийн талаар судлаач, профессор Д.Баярхүү: “Сүүлийн хоёр сар гаруй хугацаанд хоёр улсын тэргүүн нар хоёр дахь удаагаа уулзаж байна. ”КОВИД-19” цар тахал гарснаас хоёр жил өнгөрч, ХКН-ын 20 дугаар их хурлын дараа энэхүү айлчлал болж буйгаараа онцлогтой. ХКН-ын Улс төрийн товчооны Байнгын хороо, Намын Төв хорооны бүрэлдэхүүн солигдсон үед шинэ бүрэлдэхүүнтэй уулзаж байна. “КОВИД-19”-ийн хоёр жил болон дэлхий дахиныг хамарсан геополитикийн өөрчлөлтүүдээс болж дэлхийн эдийн засаг хямарч улс орнуудын гадаад харилцаа зогсонги байдалд орсон. Гадаад худалдаа, хөрөнгө оруулалт, эдийн засгийн хамтын ажиллагаа ч таатай биш байна. Манай улсын хувьд дээрх байдлуудыг арилгахад уг айлчлал өндөр ач холбогдолтой гэж үзэж байна. Айлчалын үеэр албан ёсны хэлэлцээ хийж хамтарсан тунхаг гаргах юм” гэж мэдээлэл өглөө.
