Төрөөс эмийн талаар баримтлах бодлогын хэрэгжилтэд гүйцэтгэлийн аудит хийхэд 44 аж ахуйн нэгж эм, эмнэлгийн хэрэгсэл үйлдвэрлэх 63 тусгай зөвшөөрөл эзэмшиж буйгаас 84.1 хувь нь эм үйлдвэрлэлийн зохистой дадал GMP-ын шаардлагыг хангаагүй байна. Эрүүл мэндийн даатгалын сангийн хөнгөлөлтөөр олгож буй эмийн 10 хувь нь чанаргүй байх эрсдэлтэй, зах зээлд борлуулж байгаа эмийн 14 хувь нь стандартын бус, 19 хувийг бүртгэлгүй эм эзэлж байгаа гэсэн судалгаа гарчээ. Мөн Төрийн хяналт шалгалтын хуулиар аливаа компанид шалгалт хийхэд заавал урьдчилан мэдэгддэг байна. Энэ дагуу 2019 онд мэргэжлийн хяналтын байгууллагаас шалгалт хийхэд бүртгэгдээгүй болон бүртгэлийн заавраас зөрсөн 99 нэрийн 1604 ширхэг, хэрэглэх хугацаа дууссан 50 нэрийн 550 ширхэг, хаяг шошгийн зөрчилтэй нэг нэрийн 18 ширхэг, хадгалалтын горим зөрчсөн 14 нэрийн 54 ширхэг эм, эмнэлгийн хэрэгсэл илэрчээ. Ингээд зөрчил гаргасан 13 байгууллага, 28 албан тушаалтанд нийт 15 сая 250 мянган төгрөгийн шийтгэл ногдуулсан байна. Энэ мэтчилэн эм, эмийн бүтээгдэхүүн, түүний үйлчилгээтэй холбоотой зөрчлүүд илэрсээр байна.
Тиймээс эмийн асуудлыг хянан шалгах зайлшгүй шаардлага байгаагаас үүдэн
УИХ-ын гишүүн Н.Учрал нарын 22 гишүүн эмийн асуудлыг хянан шалгах түр хороо байгуулах тогтоолын төслийг энэ сарын 3-нд өргөн мэдүүлсэн, УИХ-ын чуулганаар “Хянан шалгах түр хороо байгуулах тухай” тогтоолын төслийг байнгын хороонд буцаалаа. Гэхдээ энэ асуудалд олон нийт анхааралтай хандаж, үүсээд байгаа сөрөг үр дагавар, түүнээс хуулийн хүрээнд хэрхэн сэргийлж болоход анхаарах цаг нь нэгэнт болсныг илэрхийлж байна.
