УИХ-ын 2020 оны сонгуульд МАН ялалт байгуулж 62, АН 11 суудал авч, бие даагч болон эвслээс гурван нэр дэвшигч сонгогдсон. Тэр дундаа СХД-ийн 3 мандаттай 28-р дугаар тойрогт МАН-аас нэр дэвшигчид багаараа ялалт байгуулсан. Тодруулж хэлбэл, Д.Сумъяабазар, Н.Учрал, П.Анужин нар УИХ-ын гишүүнээр сонгогдсон ч Уул уурхайн сайд, УИХ-ын гишүүнээр ч ажиллаж байсан Д.Сумъяабазар хотын дарга болсноор тойрогт нь нөхөн сонгууль явагдахаар болоод байгаа.
Нийслэлийн МАН-ын хорооны V хуралдаанаас хотын даргад Д.Сумъяабазарыг нэр дэвшүүлж, МАН-ын Удирдах зөвлөлийн хурлаар хэлэлцэн шийдвэрлэсэн асуудал. УИХ-ын гишүүн хүн хотын дарга болж, гишүүний албанаас чөлөөлөгдсөнөөр нөхөн сонгуулийн асуудал олны анхаарлыг татаж байгаа юм. Ингэснээр УИХ-ын сонгуулийн 28 дугаар тойрог буюу Сонгинохайрхан дүүрэгт ирэх зургадугаар сард нөхөн сонгууль явагдах нь ч тодорхой болж байна.
Тэгвэл томсгосон тойргийн том мандаттай энэ хэсэгт хэн хэн нэр дэвших бол…
Өнгөрсөн УИХ-ын сонгуулиар “Иргэдийн шударга шүүх” ТББ-ын тэргүүн Х.Бат-Ялалт, НИТХ-ын төлөөлөгч С.Мөнхчулуун, “Та бидний эсвэл”-ээс Э.Батшугар, АН-аас Үндэснийй үйлдвэрлэгч Г.Очирбат, ШӨХТГ-ын даргаар ажиллаж байсан О.Магнай гээд олны танил хүмүүс өрсөлдсөн байдаг. Харин нөхөн сонгуульд эдгээр эрхмүүд дахин оролцох болов уу гэсэн таамаг ч олны дунд байгаа. Ямар сайндаа л Ерөнхийлөгч асан Н.Энхбаярын хүү Э.Батшугар өрсөлдөөд ялалт байгуулж чадахгүй бол ёстой л СӨХ-ны даргын сонгуульд л нэрээ дэвшүүлэх л үлдэх байх гэсэн хошигнол ч цахим орчинд яваад эхэлсэн. Тэд хэн хэнийгээ нэр дэвших бол гэсэн ажиглалтын байдалтай байгаа ч өнгөрсөн сонгуульд нэр дэвшсэн эдгээр эрхмүүд дахин өрсөлдөх магадлал тун өндөр юм.
СХД-ийн хувьд хамгийн их улс төржсөн, халамж хавтгайрсан дүүрэг гэж ярих нь ч, шүүмжлэлд өртөх нь ч бий. Тэр ч утгаараа МАН-аас бусад нам, эвслийн нэр дэвшигчдэд бараг боломж өгөхгүй, ширүүхэн өрсөлдөөнтэй тулгардаг.
Тэгвэл энэ удаад их хуралд төлөөлөл болгож сонгосон хүн нь Хотын дарга болсон учир дахин МАН-аас сонголт хийх үү, эсвэл өөр сонголт уу гэдэг асуулт 28-р тойргийн сонгогчдод тулгарч байгаа болов уу. Ямартай ч нөхөн сонгуулийн прогнозыг харвал Х.Бат-Ялалт, С.Мөнхчулуун, Г.Очирбат нарын дунд хүчтэй өрсөлдөөн явагдах нь тодорхой. Харин хэн сонгогдох вэ? гэдэг нь гол асуудал юм. УИХ-ын хуралд ганцхан суудалтай нам эвслээс байх уу? бие даагч байх уу. Эсвэл их хуралд 11 суудалтай АН байж сөрөг хүчний үүргийг хүчтэй гүйцэтгэх үү гэдэг сонин. АН-аас СХД-ийг төлөөлөх гишүүн гарвал дүүрэгтээ ч, их хуралдаа ч сөрөг хүчний үүргийг гүйцэтгэх нь мэдээж. Энэ удаагийн их хурлын гишүүдийг харахад АН-аас тэр гэж онцгойлох хүн хуруу дарам цөөн гэдэгтэй марган хүн ч байхгүй. С.Одонтуяа л намынхаа нүүрийг талхалж, их хуралд сөрөг хүчний үүргээ сулхан биелүүлж байгаа нь ч үнэн.
