Улс төрийн орчинд сонин хачин үзэгдэл Улсын их хурлын болоод Ерөнхийлөгчийн сонгуулийн үеэр үзэгдэх нь элбэг ээ. Инээдэм ч юм шиг, эмгэнэл ч юм шиг ийм дүр зургийг энэ улсад л харж болох байх…
Хайр найргүй муулж, харааж ерөөх дээрээ тулж байснаа хачин сайхан уулзаж, хошуу, хуруугаа нийлүүлчихээд салж ядахыг нь ч харж явлаа. Өстөн дайсан мэт шиг харагдах хэрнээ өөрийнх нь хүн юм шиг ч аашлахыг харж байлаа.
Үүний нэг жишээ нь сонгууль болохоор л эвлэрч нэгдэж, тэврэлдэж зураг татуулдаг улс төрийн намууд юм. Саяхан л орон нутгийн сонгуулиар Ардчилсан нам, Шинэ намтай нийлж явсан МАХН одоо болохоор “Монгол улсад улс төрийн нам үүссэний 100 жилийн ой”-оор далим болгон МАН-тай нэгдэх юм гэнэ. Энэ мэдээлэл сүүлийн өдрүүдэд нилээн ч явлаа, үнэн гэдэг нь ч тодорхой боллоо. Аль алинд нь ашиг болоод нүүдэл бий болох учраас л ийм шийдэлд хүрч байгаа болов уу. Зүгээр ч нэг гэж улс төрд байхгүй асуудал.
Гадуур чих тавихад, энэ үйл явдлыг эсэргүүцэж байгаа нь УИХ-ын гишүүн С.Ганбаатар байгаа бол, МАХН-ын дарга Н.Энхбаяр “МАН, МАХН-ын дарга нарын шийдэх асуудал биш, ард иргэд, гишүүдээсээ санал авна” гэж ярьж байгаа юм. Харин нэгдэх саналыг МАН-аас тавьсан бололтой. Нэгдэх уулзалт нь ч хэдийнээ болж, Д.Амарбаясгалан, Б.Тулга, О.Цолмон нар ч оролцсон гэж байгаа юм. Нүүрэн дээрээ хэн ч нэгдэх болсноо хэлэхгүй байгаа ч ачир дээрээ аль хэдийнэ тохиролцчихоод одоо хэн, хэн нь ямар суудалд очихоо тохирч байгаа биз. Үүнийгээ нэгдсэн ч намын нэрийг МАН уу? МАХН уу гэдэг дээр тохирч чадахгүй байгаагаар ч тайлбарлаж байгаа сурагтай.
Ямартай ч энэ хоёр нам нэгдвэл МАН-ын гишүүд болоод эрх мэдлийн хүрээ тэлж улам хүчирхэгжих нь. Харин МАХН-д нэр дэвшиж чаддаггүй Н.Энхбаяр даргад ямар нэгэн суудал гарахаас гадна хүү Э.Батшугараа МАН-ын нэрээр улсын их хуралд оруулах гэсэн санаа яваа биз ээ. Харин Ерөнхийлөгч Х.Баттулгын хувьд л энэ удаагийн Ерөнхийлөгчийн сонгуульд хүч алдсан явдал болох нь дээ.
Гэхдээ л улс төрийн намууд салж нийлдэг энэ явдал байх нь зөв бөгөөд эрүүл үзэгдэл яав ч биш ээ… Их ч юм болно доо…
