Монгол Улсын Их Хурлын гишүүн, 20 минутын хот Үндэсний хорооны гишүүн Ганзоригийн Лувсанжамц өнөөдрийн “Мэдээллийн цаг”-аар “20 минутын хот” үзэл баримтлалын ерөнхий агуулга, зорилго, зорилт болон хэрэгжүүлэх зарчим, олон улсын туршлага, мөн “Үр дүнд суурилсан засаглал” (Results-Based Governance) болон түүний аргачлалын талаар танилцуулж байгууллагын ажилтан, албан хаагчдын тавьсан асуултуудад хариулт өглөө.
“20 минутын хот” нь дэлхийн олон улс оронд хэрэгжүүлж буй, хотын иргэдэд боловсрол, эрүүл мэнд, үйлчилгээ, ажлын байр, соёл, ногоон байгууламж зэрэг дэд бүтцэд 20 минутын дотор хүрэх боломжийг бүрдүүлэх хот төлөвлөлтийн шилдэг шийдлүүдийн нэг бөгөөд АНУ, Франц, Австрали зэрэг орнуудад жишиг болон хэрэгжиж байна. Энэхүү үзэл баримтлал нь иргэдийн амьдралын чанарыг дээшлүүлж, замын түгжрэлийг бууруулан, байгаль орчинд ээлтэй хөгжлийг дэмжих зорилготой билээ.
Үр дүнд суурилсан засаглал нь төрийн бодлого, хөтөлбөр, төсөл хөтөлбөрүүдийг төлөвлөх, хэрэгжүүлэх явцад хүрэх үр дүнг урьдчилан тодорхойлж, хэрэгжилтийг тогтмол үнэлж, хяналт шинжилгээний тогтолцоог бий болгох аргачлал юм. Энэ нь төрийн үйл ажиллагаанд нээлттэй, ил тод, хариуцлагатай, иргэдийн оролцоог нэмэгдүүлэх давуу талтай юм байна.
