Арилжааны банкууд ипотекийн зээлийн үйлчилгээ үзүүлэхдээ авах шимтгэлийн хэмжээг зээлийн үнийн дүнгийн нэг хувиар тогтоон авдаг. Харин үүнд иргэд бухимдлаа илэрхийлсээр ирж, шүүхээр шийдвэрлэх хэмжээнд хүрээд байгаа юм. Энэ асуудлаар ШӨХТГ-аас үндэслэлгүй суутгал гэж үзэн нэр бүхий есөн банкыг 20 сая төгрөгөөр торгох шийдвэр гаргасан байдаг. Банкууд энэ шийдвэрийг эсэргүүцэж шүүхэд хандаад байсан бол Давж заалдах шатны шүүхийн шийдвэр ШӨХТГ-ын талд гарсан юм.
Энэ тухай Шадар сайд С.Амарсайхан: Захиргааны хэргийн давж заалдах шатны шүүхээс арилжааны банкуудын олгож буй ипотекийн зээлийн шимтгэл 1% авч байгаа нь хууль бус гэдгийг шүүх тогтоолоо.
ШӨХТГ-аас Захиргааны хэргийн давж заалдах шатны шүүхэд гомдол гаргасан бөгөөд 2023.06.13-ны өдрийн давж заалдах шатны шүүх хуралдаанаар анхан шатны шүүхийн шийдвэрийг бүхэлд нь хүчингүй болгож, арилжааны банкуудын ипотекийн зээл олголтын шимтгэлийг 1 хувь гэж тогтоосон нь үндэслэлгүй, хууль бус гэж үзлээ.
Улсын дээд шүүх уг шийдвэрийг хууль ёсных гэж үзвэл ипотекийн зээлтэй 110 мянган иргэн 1 хувиа банкуудаас буцаан нэхэмжлэх боломжтой болно.
Ипотекийн зээлтэй, зээл авах гэж буй иргэн бүрт хамаатай шийдвэр.
Шударга өрсөлдөөн, хэрэглэгчийн төлөө газраас Монголын хуульчдын холбоонд хүсэлт тавьж банк санхүүгийн чиглэлээр мэргэшсэн Монголын өмгөөлөгчдийн холбооны өмгөөлөгч О.Батхүү, С.Ялалт, Цэнгэл, Чинбат нартай гэрээ байгуулж, үнэ төлбөргүй хууль зүйн туслалцаа авч хамтран ажиллаж байна.
Ипотекийн 8% зээлтэй 65.000 айлын зээлийн хүүг 6% болгон бууруулах асуудал ч үргэлжилнэ” гэж мэдээллээ.
