Үүний дагуу 2024 онд улсын төсвийн хөрөнгө оруулалтаар хийхээр шийдвэрлэж, тендерийн сонгон шалгаруулалтыг зарлажээ. Ийн “Билгүүн Монгол констракшн” ХХК шалгарч, 2024 оны зургаадугаар сарын 20-ноос Сэлбэ голын голдирлыг өөрчлөн барьсан “S’Outlet” дэлгүүрийн буулгасан талбай орчимд нийт 1.5 км урт, 4.1-6.1 метр өндөр, төмөр бетонон хийцтэй үерийн түшиц хана барих ажлыг эхлүүлсэн байна.
Өнөөдрийн байдлаар 1 км түшиц ханыг хийсэн бөгөөд үлдсэн ажлыг ирэх зургаадугаар сарын 30-нд дуусгах төлөвлөлттэй байгаа аж. Уг түшиц хананы өндрийг 100 жилд болох үерийн түвшингээр тогтоосон. Өөрөөр хэлбэл 1966 онд болсон үертэй дүйцэхүйц буюу 100 жилд нэг удаа тохиолдох үерээс сэргийлэхийн тулд уг түшиц хананы өндрийг тогтоосон гэсэн үг аж. Хэрэв энэ даланг барихгүй бол хотын төвийн хэсгийн 30-40 хувь усанд автах эрсдэлтэй.
Мөн уг түшиц хананы гадна талаар 2.3 метр нь шороон дүүргэлт хийж нягтруулах ба хамгийн өндөр ил гарсан хэсэгт цаашид зургийн дагуу 1.7 метр өндөр гарах хэсэгт тохижилт, явган болон дугуйн зам хийхийг УБЗАА-ны Хотын инженерийн дэд бүтцийн газрын дарга Л.Алтангэрэл болон холбогдох албаныхан хэллээ.
