Байгаль орчин, уур амьсгалын өөрчлөлтийн сайд Б.Батбаатар Фижи Улсын Нади хотноо болж буй Ази, номхон далайн байгаль орчны сайд нарын 6 дугаар форумд оролцох үеэрээ Оманы Султант Улсын Байгаль орчны ерөнхий газрын Ерөнхийлөгч бөгөөд НҮБ-ын Байгаль орчны 7 дугаар ассамблейн Ерөнхийлөгч Абдуллах бин Али Ал Амритай (08.28) уулзлаа.
Уулзалтын үеэр ижил төстэй зүйлс ихтэй, тулгарч буй бэрхшээл адил тул хоёр талт хамтын ажиллагааг хөгжүүлэх, улмаар олон улсын гэрээ, конвенцын хэрэгжилтийг хангахад харилцан дэмжин ажиллах чиглэлүүдээр санал солилцов.
Ирэх жил Улаанбаатар хотноо болох Цөлжилттэй тэмцэх тухай Нэгдсэн Үндэстний Байгууллагын конвенцын талуудын 17 дугаар бага хурлыг үр дүнтэй, бүтээлч, агуулга өндөртэй зохион байгуулах нь чухлыг ярилцаад хоёр улс хамтарсан санаачилга гаргахаар тогтлоо.
Санаачилгын төслийг 9 дүгээр сардаа багтаан боловсруулахдаа зөвхөн хоёр улсын бус илүү өргөн хүрээнд улс төрийн манлайлалд түшиглэсэн байхыг анхаарах, энэ оны 12 дугаар сард болох Нэгдсэн Үндэстний Байгуулалгын Байгаль орчны 7 дугаар ассамблей хүртэлх хугацаанд эцэслэн дуусгах зэрэгт санал нэгдэв. Хоёр улс НҮБ-ын Байгаль орчны 7 дугаар ассамблейн үеэр Сайд нарын түвшний арга хэмжээ зохион байгуулах замаар тус санаачилгын төслийг танилцуулан хөгжлийн түншлэгч нарыг татан оролцуулахыг зорьж ажиллахаар боллоо.
Уулзалтын төгсгөлд хоёр талт хамтын ажиллагааг эрчимжүүлэхдээ Цөлжилттэй тэмцэх асуудлыг түлхүү анхаарах, яамд хоорондын ахлах албан хаагчдийн уулзалтуудыг тогтмолжуулахыг харилцан үүрэг болгохоор тогтлоо.
