Монгол Улсын Ерөнхий сайд Г.Занданшатар Дорноговь аймгийн Замын-Үүд сумын иргэдтэй уулзжээ. Уулзалтад 800 орчим иргэн оролцож, санал, хүсэлтээ уламжилжээ.
Замын-Үүд сумынханы хувьд газрын асуудал тулгамдсан асуудлын нэг болжээ. Тус суманд газар өмчлөл хаалттай байна гэж иргэд шүүмжилж, эзэмших хэлбэрээр газрын зөвшөөрөл гаргуулья гэсэн ч хүртээмжгүй байгааг хэлэв.
Ерөнхий сайд Г.Занданшатар газартай холбоотой иргэдийн санал хүсэлтийг үндэслэж, Замын-Үүд сумын хэмжээнд газар олголтыг шалгуулахаар АТГ, ЦЕГ, ТЕГ-ын хамтарсан ажлын хэсэг байгуулахаар шийдэв. Ажлын хэсгийг ирэх долоо хоногт Замын Үүдэд ажиллуулахаар болжээ
Түүнчлэн хил, гаалийнханы уялдаа холбоогүй байдлыг цэгцлэх үүднээс хяналтын тогтолцоог нэгдмэл удирдлагатай болгох тал дээр Засгийн газар анхаарч ажиллана гэсэн Ерөнхий сайдын байр сууриа илэрхийлжээ
Г.ЗАНДАНШАТАР: Замын-Үүдэд цэгцрэх хөдөлгөөн өрнүүлж, хил, гааль, чөлөөт бүсийн уялдаа холбоог сайжруулж байж авлигын эрсдлийг бууруулна. Үүний эхлэл болгож сумын газар олголтыг эргэж харах, бүртгэлийг цэгцлэх ажлыг нэн даруй хэрэгжүүлнэ. Энэ бол Замын-Үүд сум цэгцрэх хөдөлгөөн юм.
Зорчигч болон ачаа тээврийн үйлчилгээ эрхэлж буй жолооч нарт татвар ногдуулахдаа хөдөлмөрийн хөлсний доод хэмжээг үндэслэж хувь хэмжээ тогтоож буйг эргэж харахыг тэдний төлөөлөл хүслээ. Хөдөлмөрийн хөлсний доод хэмжээ нэмэгдэхээр татвар хураамж дагаад өсч, дарамт болж буйг хэлэв.
Жолооч нарт ногдуулсан татварын хувь хэмжээг 30 хувь болгож бууруулсан төдийгүй татварын шатлалыг үгүй болгосон тогтоолыг аймгийн ИТХ баталсан. Харин тогтоол албажих үйл явц холбогдох яаманд гацаад байсныг шинэ оны босгон дээр гацаанаас гаргасан гэж Ерөнхий сайд мэдээлэв.
