“Трансперенси интернэшнл”-ээс “Авлигын төсөөллийн индекс-2023” судалгааны тайлангаа танилцууллаа. Нийт улс орнуудын гуравны хоёр нь 50-с доош оноо авч АТИ-ийн дэлхийн дундаж оноо сүүлийн 12 жил дараалан 43 хэвээр байна. Тэгвэл манай улс 2023 онд 33 оноо авч 180 улсаас 121-т оржээ. 2023 оны онцлох сэдэв нь авлига ба шударга бус байдал байсан юм. Харин 2022 онд Монгол улс 33 оноо авч 116-д жагссан нь өмнөх жилээсээ 5 байр ухарсан үзүүлэлт болжээ. Судалгаагаар 100 оноо руу дөхөх тусам сайн ажиллаж байна гэж үздэг. Харин 2022 онд “Дайнтай холбоотой хямрал” байсан онцлогтой. Судалгаанд 9 байгууллагаас эх сурвалжийн үнэлгээ өгч АТИ-ийн оноог гаргадаг бол 2023 онд Дэлхийн банк болон Эдийн засгийн форум үнэлгээ өгөөгүй байна. Тиймээс Монгол улсад үнэлгээ өгсөн 7 эх сурвалж байсан. Өмнөх онтой харьцуулж харахад 3 нь өмнөхтэйгөө ижил, 2 нь өсөж, 2 нь буурсан үзүүлэлттэй байна.
Монгол улсад өгсөн нийтлэг зөвлөмж нь:
- Төрийн анхан шатны мэдээлэл хомс
- Иргэдийн мэдэх эрхийг муу хангадаг
- Шийдвэр гаргахад иргэдийн оролцоо сул
- Төрийн албан тушаалтнууд хүний эрхийн мэдрэмж муу зэрэг шалтгаан байна. Эдгээрээс үүдэн авлигын үзүүлэлт ухарсан уу гэдгийг бодох асуудал юм.
