Нүүр хуудасМэдээУИХ: АБГББХ: Тусгай хяналтын дэд хорооны бүрэлдэхүүнд өөрчлөлт оруулах тухай асуудлыг хэлэлцлээ

УИХ: АБГББХ: Тусгай хяналтын дэд хорооны бүрэлдэхүүнд өөрчлөлт оруулах тухай асуудлыг хэлэлцлээ

Улсын Их Хурлын Аюулгүй байдал, гадаад бодлогын байнгын хорооны өнөөдрийн /2023.10.17/ хуралдаанаар Тусгай хяналтын дэд хорооны бүрэлдэхүүнд өөрчлөлт оруулах тухай асуудлыг хэлэлцлээ.

Улсын Их Хурлын гишүүн Баагаагийн Баттөмөрийг Улсын Их Хурлын Тусгай хяналтын дэд хорооны гишүүнээр томилуулах тухай албан тоотыг Улсын Их Хурал дахь Монгол Ардын Намын бүлгийн дарга Д.Тогтохсүрэнгээс, Улсын Их Хурлын гишүүн Салдангийн Одонтуяаг мөн тус Дэд хорооны гишүүнээр томилуулах тухай албан тоотыг Улсын Их Хурал дахь Ардчилсан Намын бүлгийн дарга О.Цогтгэрэлээс Улсын Их Хурлын дарга Г.Занданшатарт тус тус ирүүлсэн байна.

Байнгын хорооны хуралдаанаар дээрх асуудлыг хэлэлцэх үед Улсын Их Хурлын гишүүн Д.Ганбат үг хэлж байр сууриа илэрхийлсэн юм.

Монгол Улсын Их Хурлын тухай хуулийн 28 дугаар зүйлийн 28.5 дахь хэсэгт дэд хорооны бүрэлдэхүүнд зөвхөн харьяалах Байнгын хорооны гишүүд орох бөгөөд дэд хорооны бүрэлдэхүүний тоо нь тухайн Байнгын хорооны гишүүдийн тооны хоёрны нэгээс илүүгүй байна хэмээн заасан бөгөөд Улсын Их Хурлын гишүүн Баагаагийн Баттөмөр, Салдангийн Одонтуяа нарыг Тусгай хяналтын дэд хорооны бүрэлдэхүүнд оруулахыг дэмжье гэсэн саналын томьёоллоор санал хураалт явуулахад Байнгын хорооны хуралдаанд оролцсон гишүүдийн олонх дэмжлээ.

Мөн хуралдаанаар Монгол Улсын Их Хурлын 2023 оны намрын ээлжит чуулганы 10 дугаар сард Аюулгүй байдал, гадаад бодлогын байнгын хорооны эрхлэх асуудлын хүрээнд хамаарах хууль, Улсын Их Хурлын бусад шийдвэрийн төслийг хэлэлцэх цаглаврыг хавсралтаар баталлаа.

Тус байнгын хороо 10 дугаар сард “Даян дэлхийн ногоон хөгжлийн институтын эрх зүйн статус, эрх ямба, дархан эрхийн тухай Монгол Улсын Засгийн газар болон Даян дэлхийн ногоон хөгжлийн институт хоорондын хэлэлцээр”-ийн төсөл, “Онцгой байдлын ерөнхий газарт гал унтраах тусгай зориулалтын машин нийлүүлэх төсөл”-ийг хэрэгжүүлэх Монгол Улсын Засгийн газар, Бүгд Найрамдах Франц Улсын Засгийн газар хоорондын Санхүүгийн хэлэлцээрийн төслийг зөвшилцөх, мэдээлэл сонсох зэрэг асуудлуудыг хэлэлцэхээр төлөвлөжээ

ХАРИУ ҮЛДЭЭХ

Сэтгэгдэл оруулна уу!
энд нэрээ оруулна уу

This site uses Akismet to reduce spam. Learn how your comment data is processed.

ИХ УНШИГДСАН