Говь-Алтай аймгийн Эрдэнэ суманд дөрөвдүгээр сарын 10-11-ний шөнө, 00:10-04:00 цагийн хооронд хүчтэй шороон шуурга шуурч, салхи секундэд 34 м/с, зарим үед 44 м/с хүрч, хүчтэй шороон шуурганы улмаас Говь-Алтай аймгийн Эрдэнэ сумын 130 орчим гэр цөмөрч, 17 байшингийн дээвэр хууларч, 230 айлын хашаа нуржээ.
Үүссэн нөхцөл байдалтай холбогдуулан Монгол Улсын Шадар сайд, УОК-ын дарга С.Амарсайхан шороон шуурганд гэр нь нурж, дахин ашиглах боломжгүй болсон айл, өрхүүдэд гэр олгох, тусламжийн цуваа хөдөлгөхөөр шийдвэрлэлээ.
Тусламжийн цуваа хүргэх ажлын хэсгийг УОК-ын Нарийн бичгийн дарга, хурандаа Т.Баярхүү ахалж байгаа бөгөөд Говь-Алтай аймгийн Эрдэнэ суманд үүссэн бодит нөхцөл байдалтай танилцаж, цаашид авч хэрэгжүүлэх арга хэмжээг тодорхойлох юм.
