Экологийн цагдаагийн албанаас хүрээлэн буй орчны эсрэг гэмт хэрэг, зөрчлийг илрүүлэх, таслан зогсоох, урьдчилан сэргийлэх, байгаль экологид учирсан хохирлыг бууруулах, алба хаагчдыг мэргэшүүлэх, сурган дадлагажуулах зорилгоор Азийн сангийн Монгол дахь суурин Төлөөлөгчийн газар, Лондоны амьтан судлалын нийгэмлэгийн Монгол дахь Төлөөлөгчийн газартай хамтран ажиллах “Санамж бичиг” байгууллаа.
“Санамж бичиг” байгуулах арга хэмжээ өчигдөр /2024.01.22/ болж, Экологийн цагдаагийн албаны дарга, цагдаагийн хурандаа М.Батсайхан, Азийн сангийн Монгол дахь суурин төлөөлөгчийн үүргийг түр орлон гүйцэтгэгч Сара Тэйлор, Хууль засаглалын хөтөлбөрийн захирал Г.Гантулга, төслийн ахлах зөвлөх Л.Байгаль, Лондоны амьтан судлалын нийгэмлэгийн Монгол дахь Төлөөлөгчийн газрыг төлөөлж захирал У.Тунгалаг нар оролцов.
Ийнхүү Азийн сангийн Монгол дахь суурин төлөөлөгчийн газар, Лондоны амьтан судлалын нийгэмлэгийн Монгол дахь төлөөлөгчийн газартай хамтран ажилласнаар иргэд, олон нийтийн экологийн боловсролыг дээшлүүлэх, соён гэгээрүүлэх, хүрээлэн буй орчны эсрэг гэмт хэрэг, зөрчилтэй тэмцэх ажлыг шинэ түвшинд хүргэх, энэ ажилд хиймэл оюун ухаанд суурилсан техник технологи, инновацыг нэвтрүүлэх гэх мэт олон талт ажил, арга хэмжээнүүдийг шат дараатай зохион байгуулах боломжийг бүрдүүлэх юм.
