Улсын Их Хурлын гишүүн Х.Болормаагийн Сүхбаатар дүүргийн Засаг даргаар ажиллаж байхдаа санаачлан, 2024 оны тавдугаар сард шавыг нь тавьж байсан Спорт цогцолборын бүтээн байгуулалтын ажил бүрэн дуусаж, Улсын комисс хүлээн авчээ.
Нийт 29,920 ам метр талбай бүхий тус цогцолбор нь амралт, чөлөөт цаг, спортын иж бүрэн тоноглолтой, орчин үеийн байгууламж бөгөөд үйл ажиллагаагаа эхлүүлэхэд бэлэн болжээ. Тус спорт цогцолборт сагсан бөмбөг, волейбол, заалны болон гадна талбайн хөлбөмбөг, талбайн болон ширээний теннис, бокс, дасгал хөдөлгөөн, хананд авиралт, гүйлт зэрэг олон төрлийн спортоор хичээллэх боломжтой юм.
Мөн гурван давхар спортын барилгад үндсэн талбай, бэлтгэлийн заал, хувцас солих өрөө, үзэгчдийн суудал, шүүгч болон камерын өрөө, хурлын болон бусад үйлчилгээний өрөө тасалгааг иж бүрнээр нь шийджээ. Гадна орчинд ногоон байгууламж, хүүхдийн тоглоомын талбай, гэр бүлээрээ амарч, чөлөөт цагаа өнгөрүүлэх бүс, дугуйн зам, автомашины зогсоол, гэрэлтүүлэг зэрэг тохижилтыг хийжээ.
Анх шав тавьж байх үед Сүхбаатар дүүрэг спорт цогцолборгүй байсан бөгөөд Засаг дарга Х.Болормаа хүүхэд, залуусын спортоор хичээллэх, иргэд гэр бүлээрээ чөлөөт цагаа зөв боловсон өнгөрүүлэх орчин бүрдүүлэх зорилгоор уг төслийг эхлүүлсэн байна. Цогцолборын бүтээн байгуулалт бүрэн дуусаж, ашиглалтад хүлээн авснаар тус дүүргийн 140 гаруй мянган иргэн, ялангуяа хүүхэд, залуус спортоор хичээллэх, эрүүл, идэвхтэй амьдралын хэв маягийг хэвшүүлэх, чөлөөт цагаа зөв боловсон өнгөрүүлэх шинэ орчинтой болж байна
Энэ томоохон бүтээн байгуулалтыг орон нутгийн төсвийн хөрөнгө оруулалтаар хэрэгжүүлжээ.
