ХҮҮХДИЙН ТОГЛООМЫН ТАЛБАЙН /ЕРӨНХИЙ ШААРДЛАГА MNS6751:2019/ СТАНДАРТЫГ ХАНГУУЛАХ ХЯНАЛТ ШАЛГАЛТ ЗОХИОН БАЙГУУЛЛАА.
Хүүхдийн эрхийн тухай хуулийн 15 дугаар зүйлийн 15.1.2, 15.1.4, Хүүхэд хамгааллын тухай хуулийн 18 дугаар зүйлийн 18.2.1, Хүүхдийн эрхийн улсын ахлах байцаагч, хүүхдийн эрхийн улсын байцаагчийн 2022 оны ерөнхий төлөвлөгөө, Нийслэлийн Гэр бүл, хүүхэд, залуучуудын хөгжлийн газрын даргын 2022 оны 01/82 тоот удирдамж, Хүүхдийн тоглоомын талбайд тавигдах ерөнхий шаардлага MNS6751:2019 стандартын хэрэгжилтэд хяналт тавих зорилгоор
Нийслэлийн 9 дүүргийн нутаг дэвсгэрт нийтийн эзэмшлийн гудамж талбай, хүүхдийн тоглоомын талбайн бүрэн бүтэн байдал, хүүхдийг болзошгүй осол гэмтлээс урьдчилан сэргийлэх зорилгоор хяналт шалгалтыг 9 дүүргийн Гэр бүл, хүүхэд, залуучуудын хөгжлийн хэлтэс, Мэргэжлийн хяналтын хэлтэс, цагдаагийн хэлтэстэй хамтран 2022 оны 02 сарын 15-ны өдрөөс 03 сарын 29-ний өдрүүдэд зохион байгууллаа.
Орон сууц, гэр хорооллын дунд байрлах 973 тоглоомын талбайн стандартын хяналт шалгалт хийснээс шаардлага хангасан 431, шаардлага хангаагүй 385, солих, сайжруулах шаардлагатай 157 тоглоомын талбай байна.Хяналт шалгалтаар:
1. Хүүхдийн тоглоомын талбайн тоглоомууд эвдрэл ихтэй, зориулалтын зөөлөн дэвсгэргүй, хашаа хайс нь эвдэрсэн, эсвэл машин замаас тусгаарлаагүй, хурд сааруулагч, тэмдэг тэмдэглэгээ хийгдээгүй, талбайн хувьд бага, ашиглалтаас гарсан хуучин эвдэрхий тоглоомоо хураан аваагүй, цэвэрлэгээ үйлчилгээ, ариутгал хийгддэггүй;
2. СӨХ-гүй байрнууд нь гадна орчны цэвэрлэгээ үйлчилгээ хангалтгүй, хог ихтэй;
3. Хүүхдийн тоглоомын талбай хогийн цэгтэй ойрхон, машин замаас тусгаарлагдаагүй, орчны бохирдол ихтэй. Саравчинд согтуу, тэнэмэл иргэд цугларч оршин суугчдын амгалан тайван байдлыг алдагдуулдаг;
4. Гэрэлтүүлэг муу, камер хангалтгүй;
5. Нийтийн эзэмшлийн зам талбай, хүүхдийн тоглоомын талбайн орчимд тэжээвэр амьтан (нохой)-ны ялгадас их буюу орчныг бохирдуулдаг;
6. Тоглоомын талбайн 20-оос багагүй хувьд ногоон байгууламж байхгүй;
7. Хүүхдийн тоглоомын талбайн гадаргуу нь зориулалтын бус буюу хөвсгөр, резин, элс, голын хайрга, хиймэл зүлэг зэргийг талбайн гадаргууд хэрэглээгүй;
8. Хариуцах, хяналт тавих байгууллага тодорхой бус /ялангуяа гэр хорооллын дунд байрладаг тоглоомын талбайд/ Хүүхдийн тоглоомын талбайд мэдээлэх тэмдэг байхгүй зэрэг нь Монгол Улсын Хүүхдийн тоглоомын талбайн ерөнхий стандарт MNS 6751:2019 шаардлага хангаагүй зэрэг нийтлэг зөрчлүүд илэрч байна.
Иймд хүүхдийн тоглоомын талбайг эзэмшигч, хариуцагч нарт зохих шатны байгууллагуудад хүүхдийн тоглоомын талбайн /MNS6751:2019/ стандартын хэрэгжилтийг хангуулах, хүүхдийн тоглоомын талбайн ашиглалт, хяналт хамгаалал, сайжруулалт, хүүхдийн эрүүл аюулгүй орчин бүрдүүлэх, илэрсэн зөрчлийг арилгуулах чиглэлээр хүүхдийн эрхийн улсын байцаагчийн зөвлөмж, шаардлагыг хүргүүлэн ажиллалаа.
